只要不放棄 - 台北馬拉松PB!

99年用了4:30完成馬拉松的小叻, 3:20的目標對小叻來說, 是個遙遠的夢.
05年及06年廈門曾希望完成sub3:30的目標, 可惜始終未能達標.

10月尾在韓國跑完一場3:25之後, 激發了小叻的戰鬥心, 定下了台北3:20的目標.
因自己之前根本沒有想過要再造PB, 所以一早報了12月頭新加坡馬拉松觀光團, 一場3:33加上賽後病了, 令小叻信心大跌, 大家亦一致不看好小叻會做到3:20... 

15/12出征台北前早上, 突然在家中暈倒... 然後小叻在想, 應否認命, 不出發, 放棄自己的夢呢?
然後廖sir著我先出發, 再打算...

晚上去了士林夜市掃街, 炸臭豆腐, 辣豆腐, 魷魚羹, 當歸鴨, 紅油抄手, 大餅包小餅, 蚵仔煎, 窩夫, 棺材版, 果汁... 盡興而回! 最欣賞是朱古力醬士多啤梨~

16/12早上看賽道, 唔明點解下午又行多一次?! 想悶死人咩? 不過小叻又懶得落車, 所以就...

下午跟鴨仔團去台北探索館, 101, NewYorkNewYork, 中正紀念堂, 走來走去, 很累!

晚飯後領隊派發號碼布和場刊. 號碼布是"913", 是否代表"941生"呢?
參賽名單上有18人, 包括韓妹一個, 日本妹一個, 鬼妹一個, 再加上小叻曾經輸給的G小姐... 獎牌只得兩個, 小叻狀態又不好... 廖sir一群人, 最小機會拿獎的是我, 點算好呢?
晚上8時半出西門盯買手信買到要買埋行李箱! 行到10時半, 12時才睡, 明早還要4時起床, 4時半出發啊!

    
17/12 老實說, 小叻心裡早打了輸數. 小叻的目標是總之under3:25, 破PB, 和盡量跟到G小姐, 爭獎!由於2km已經發現跟不到錶的嘟嘟聲, 所以小叻就懶得理甚麼pacing! 小叻只是按自己當時的感覺, 盡量輕鬆地快跑.

6km, 見到有個人跳著繩跑, 心想只是跑9km吧? 點知去到9km分支路, 他轉去了全馬那邊! 我追到成11km, 要發少少力才過了他, 真是奇人奇技, 勁!

9km, 一名擺手左搖右擺, 又八字腳的韓國女子過了我, 我心想... 跑成咁都快過我? 12-13km, 接回半馬跑得慢的人, 屍橫遍野... 慢跑的行的... 好得人驚, 要不受他們影響繼續快跑, 有點困難... 小叻於是找前面橙背心全馬男子緊釘, 免得自己pacing慢了!

這時有兩位台灣黃白背心男人經過, 讚我很棒! 小叻就照自己舒服的pacing, 跟他們一起跑. 當16-17km, 當他們發現小叻還可以變速過人的時間, 他們就讚小叻'了不起'和'很厲害'! 呵呵~
過了20km, 在似'三號幹線'的高速公路上跑, 很大風, 小叻最怕悶咖喇~ 加上腳有點扯, 膝痛毛病有點閃出來,

看看21km的時間, 要3:20有點困難... 加上小叻好像慢了點, 跟不上黃背心男子, 有點氣餒...
這時看見Keith對面線迎面而來, 我們打了招呼... 小叻提自己:"比賽時每一刻都不可以放鬆, 不可以放棄!"
然後和對頭的蔡生擊了掌, 似乎有點動力傳了過來, 於是小叻慢慢加速超前了黃背心!
之後就見到嘉慧了, 好時間呀~ 她後面應該有兩個台灣女子, 然後u-turn前1k, 見到之前過了我的韓國女跑手!
回頭拿了綠色手圈, 風仍然好大, 這時有一身型健碩男子發力經過, 就專心跟著他跑, 不過只吊到1k, 又其實擋不到風, 於是小叻又試下跟在兩名男子身後, 都無用... 只有加點力跑吧!
中途在對頭見到朋友Connie, 很意外呢!

29km, 風沒有那麼大, 好想發力但要游水過一些好慢的半馬選手, 小叻好'忟'! 想喊!

32km, 終於可以跟半馬人士分開一會, 不過之後是上落橋和大逆風, 看看錶時間無多, 如果pacing再跌就PB無望了, 好沮喪...
33km見到韓妹, 小叻慢慢拉近距離, 34km一口氣發力過了韓妹.
時間是2:30, 見到Keith和回程, 小叻還有8km! 究竟最後個u-turn在那裡? 遠眺還有大鈄橋上鈄, 唔好玩啦~ 我無貨喇...

36km, 終於turn了, 不過小叻真的沒有力再加... 於是死跟前面幾個台灣男子. 想加大步幅, 但一下鈄又拉住想抽... 37km, 小叻提自己只要捱多20分鐘唔抽, 就可以PB了, 要頂住~
仲有要有跑得辛苦的感覺, 唔好留喇~

39-41km的牌, 竟然喜出望外的近! 望一望錶, 咿~ 320, 有機喎~ 專心, 就當跑interval吧!
最後1k, 竟然要入隧道再上鈄, 小心, 唔好抽呀~
上完鈄又要u-turn? 點解咁耐仲未到...? 我提不起腳了!
這時聽到Keith說最後100m, 好, 小叻去盡... 完成了! 錶上時間是3:16, 我遲了約2-3分按錶, 即是3:20啦! yeah!

原來唔睇錶, 亂跑一通都可以PB!

多謝Keith和廖sir在終點等小叻! 好感動呀~

大會起初出錯成績, 寫了小叻是全場第一名, 大家說我應該很高興, 但我就說:"很可怕呀~" 不是嗎? 跑得咁慢的小叻, 得總冠軍喎? 有人叫我快快拿獎金走人... 嘩~ 咁咪即係呃人? NT1,000,000的獎金, 係好吸引, 但總賣不到小叻的人格的! 見大家指著我的名在指指點點, 說"有無攪錯?!"... 你地唔好怪小叻啦, 唔關我事咖~ 我已經第一時間通知嘉慧, 叫她去同大會appeal咖喇~

嘉慧時間2:58, 全場女子第五名, 果然是香港一姐! 獎金有5位數字, 好犀利呀!

成績3:20:19, PBPBPB, 全場名次141, 女子全場第九名! (組別也是亞軍, 輸了給快我4分鐘的日本妹, 不過由於已拿了全場獎, 所以無份!) 小叻跑了十四年, 第一次有獎金收呀!

雖然獎金只夠cover小叻今次的行程雜費和手信費用, 不過都好好好開心呀!!!

恭喜之前話要快小叻半個鐘的Keith, 結果跑2:46, 快小叻34分鐘呀~ 你好o野! 不過, 你有在終點前同小叻打氣, 話比我知仲有100米, 算你啦!

蔡生誤把一口釘書釘放入襪子, 釘子愈跑愈釘入腳板, 都跑出2:47, 組別季軍, 成績尚可. 不過小叻覺得他沒有盡全力, 應該可以跑得更好!
同組的還有上次有份去韓國MBC馬拉松的台灣特邀選手吳永發(2:43冠軍), 和香港名不經傳的王偉利(2:44 亞軍).

同團其他人, 包括蔡生, 馮立誠, B先生和A小姐, 全部分得豬肉獎, 皆大歡喜, 除了一位小朋友...

小叻想請好多人食飯, 包括Keith, 會計, 蔡生, 廖sir, 亞Lam...

遲來的星洲馬拉松後記(最終回) - 4/12 聖濤沙之旅

4/12 聖濤沙之旅

翌日晨早六時跟亞paul和耀哥復操慢跑。我們回到了38-42km的那段路，他們愈跑愈快，我就很痛苦地跟著跑 - 左膝又痛，腳板傷口又痛，昨天跑馬拉松時最後數公里的辛酸歷歷在目… 為何那麼蠢要來一個'案件重演'？

早餐後我們乘纜車往聖濤沙觀光，去了獅頭魚尾館參觀，又玩滑翔車和吊車，很刺激啊！

回市中心在美食廣場再飽吃一頓星洲美食- 抄蘿蔔糕、喇沙、印度薄餅、海南雞飯…之後，我們就回程了。

這之旅程除了熱騰騰的馬拉松、行程緊密的遊覽觀光和新加坡特式美食之外，令我們難忘的還有街頭雪糕車的雪糕三文治- 一磚磚的雪糕從冰箱拿出來即切，然後夾在兩片威化餅中央，簡直可以從拾童年美夢！

十二月跑新加坡比跑澳門好玩得多，我想我一定會再來呢！

遲來的星洲馬拉松後記(二) - 3/12 馬拉松大戰

3/12 馬拉松大戰

上線

早上五時多，天未亮，我們出發到會場The Padang – 就像跑<香港渣打馬拉松>時的光景一樣。除了兩位樂華團友跑半程和一位跑十公里之外，其餘都是全馬的參加者。

我們在終點拍照留念後，就分別寄存行李和上線 – 排在我前面寄存的人跟我的號碼是相連的，一問之下，原來又是香港人，真熱鬧啊！天還是漆黑一片，大會的指示牌又小，離隊後要找地方有點難度呢！

幸好約05:40，我順利到達起點，並站在under4:00的牌後。然後我發現愈來愈多人走入under3:00的起跑區，但從4:00起跑區內嘗試穿入3:00起跑區的卻被護衛(無錯，並非工作人員那麼簡單！)趕了回來。於是我就跟人先出4:00區，再迅速竄入3:00區的頭兩行– 成功！

好怕被人發現是混水摸魚的，但抵達後竟然發現香港跑手鐘宇灝和Richy，我們說：『那麼巧﹖』相視而笑，我們這些身經百戰的香港人上線是有點辦法的。我們跟前面精英區內的Arnold和蔡生拍照之後，就準備起跑了。

首廿公里 

今天天氣比往年好一些，起步溫度約攝氏25度，濕度九十有找，太陽伯伯沒有出來跟我們玩遊戲... 想不到最後兩公里還下毛毛雨！

雖然是沒有陽光，但起步時有點焗，也有點緊張。起步後我和Arnold、Richy一起跑，不過他們好像不費力似的，我卻有點辛苦。起步是在商業區穿插，三公里後漸入郊區才見到第一個里數牌。雖然仍不算太熱，但我才僅僅做到預定的配速，而五公里左右被Arnold和Richy拋離遠了，所以就調整了當日的目標在3:30左右。

大會的水站設於每2.5至3公里，由於位置不定，影響了我進食補充品的安排，也令我花多了時間喝水。一路上是跑往Marina City Park的路，全條行車線封了，但伴著跑的全馬參加者也不少，罷著大半空間，而他們的速度也不慢呢！第一折回點後望著對頭的跑手，像一條長得不見尾的長龍。

由於認為是次比賽是玩票性質，我和Paul都試穿了新鞋。可能新鞋配舊襪子不合適，十一公里開始覺得襪子移位了，又沒辦法，腳板踏著不平的很不舒服！到了十五公里接回起點處，廖sir跟我打氣說我還有機會在三個半小時內完成，於是就發了點力…

約十七公里追回Arnold，半程見時間尚可，但雙腳開始有點緊，唯有在每個水站喝多點運動電解飲料，和提醒自己要堅持當練長課。

尾廿公里
二十公里以後，進入了East Coast Park，是個風景優美的海岸公園。 在園內跑步空氣清新，一路上看到公公婆婆在晨運、灑太極，有人在跳舞，有小朋友在遊玩和打氣，也熱心人供應有生果，心情也輕鬆一點！

不久便看到前面有女跑手，本能地慢慢追上去，又過了好幾個女跑手。約廿四公里時蔡生在對面線打氣，然後廿八公里就過了起步後不見了的Richy。

由於仍然是陰天，我當時的目標是要在九時前要跑多一點，那太陽伯伯出來後我就可以跑少一點。三十公里之後，里程好像遠了很多似的，一公里的路程- 跑來跑去也未到！(其實是自己慢了！)

有點辛苦，想過慢下來，甚至停下來… 不過風景美，心知自己名次也不差，又穿著一件hkrunners背心，聽到很多途人叫香港加油，於是就有股無形的推動力鼓勵我向前...難得在風景優美的地方練跑, 要盡量享受啊!" 於是約三十一公里又過了一名星藉女跑手。三十五公里，發現用水淋頭後水滴落腳跟時有痛楚，後來才知是新鞋刮傷了腳跟…

到了三十七公里，見到Paul，又有一隊樂隊現場演奏強勁音樂打氣，氣氛很不錯... 5km to go，快到了！三十九公里，想發力而力有不繼，定是平時疏於練長課所致，心想若可保持五分左右步速都算托賴了。步速慢了，有點氣餒，生怕後面的女跑手會追上來… 後來見到前面有個亞洲藉女子，本來都無心追，但居然不費力就過了她！

四十一公里後，回到終點附近的獅頭魚尾像了，竟發現前面又有一個日本女跑手， 是否應該追呢？見是最後一公里，下決心就當衝圈吧，成功又過了！最後入線時望著終點大鐘，時間是3:32。終點兩旁都是打氣的群眾，聽到有人喊的的名字叫我加油，但有心無力呀，最後大鐘跳了...3:33！ 

完成喜悅

在炎熱天氣下，大家的時間尚算不錯，潔儀帶病上陣，以1:32得全場女子亞軍。全馬方面，Barth似是完全不受天氣影響，跑出3:13的佳績；耀哥時間是3:16，追著他回來呢！

跑馬拉松是辛酸的，儘管我的完成時間不太理想，跑完雙腳又扯又磨損流血又起了水泡，血染新tiger…跑完有點凍，有不想行的感覺，連去取紀念品和水也提不起勁，但現在回想起比賽時的過程是難忘的，還有件寫著42.195km的專貴紀念T-裇，好特別呀~

我被熱情的工作人員拉了去按摩–因為是全馬運動員專享的服務！雖然按摩後左右腳輪流抽筋，最後還要人幫忙穿回鞋子，但那些義務來幫忙的實習物理治療女學生，很熱情和健談呢！在終點兩旁的人群也很熱情，而每當有參加者衝線時大會司儀就會唸出參加者的名字，特別覺得高興呢！

等潔儀領獎時，我們在終點跑道旁又叫又喊地打氣和拍照，很好玩，盡興而歸！  

就馬拉松的獎金而言，得到半馬女子亞軍的潔儀嬴得S400；一位和我實力差不多的新加坡朋友麗姿，得了本地女子季軍而得S1000，本地選手的獎金名額有10個 - 總括而言，我覺得新加坡田總和馬拉松賽會比香港田總更尊重全馬運動員！

賽後市內觀光

我們下午去了牛車水，吃恭和堂龜岭膏和到美珍香買豬肉乾作手信，傍晚往河邊的酒吧會合新加坡跑友，聯誼一番。

晚上在《珍寶海鮮城》吃海鮮，那裡的鮮蝦、特式小食和辣椒蟹，我們都吃得津津有味呢！

飯後Barth等數人去了會合當地朋友，我則隨大隊乘地鐵往烏節路遊覽。那裡的商店大多已關門，不過從熙來攘往的人群和華麗的聖誕燈飾，可見其繁華的一面。

聖誕燈飾從購物大道開始，造一條長3.6公里，世界最長最光的彩燈大道，為炎熱的赤度地域，提早帶來一個普天同慶的聖誕節！賽後行了一整天，我們都有點累，不過看見別緻的聖誕樹和燈飾，我們又精神起來了！

遲來的星洲馬拉松後記(一) - 2/12 領取號碼布和稍作遊覽

今次是我第一次參加<新加坡渣打馬拉松>，也是第一次隨樂華會友前往參加馬拉松賽事。今次的領隊是曾在新加坡工作了七年的亞Paul梅琪活，團友包括：Barth、陳潔儀、Arnold、耀哥、張國強、丁有麟、Stephen和我，再加上自由行隨隊的會友衛兆華，一行十人，熱鬧得很。

2/12 領取號碼布和稍作遊覽

早上10:30出發，在候機室已碰上另一批跑友包括會友Nelly劉凱珊，預料有不少港人參賽。

抵步後在酒店放下行李，我們便趕往取參賽號碼布。因Arnold是代表香港渣打銀行出賽<全球最強之戰>，我們先陪他往Raffle Hotel領取號碼布，順便可跟一些特邀選手打個照面，然後再往Marina Mandarin Hotel取我們的。

取號碼布時有點小麻煩，因第一次的工作人員找不到部分人的號碼，要往詢問處再查才找到出來；另一方面，大會當時的紀念背心只剩XS、L和XL碼，幸好近日努力練習換來修身成果，否則XS的女裝背心怎穿得下？

由於部分團友要回酒店取背心更換，我就趁空檔探訪住在這裡的馬拉松香港隊代表蔡達明和領隊廖sir。

他們的房間比我們的Peninsula-Excelsior酒店大得多，又有無敵靚景新加坡榴槤 - 濱海藝術中心Esplanade – 香港隊果然派頭大得多！

會合大伙兒後，領隊Paul帶我們在各大酒店商場之中穿來插去，成功抵達大站 – Tiger Shop！

我們起初是被一雙黃搭粉紅的sharp跑鞋所吸引，不過耀哥果然是經驗老到，找到一雙好鞋〝TJG619〞- 我們都很愛不釋手，由於店內正在進行減價，加上指定信用卡又有折扣，扣了稅後比在香港購買便宜得多！於是五人一同買了這對賽鞋，並立即穿上試鞋，更商討考慮明天穿著新鞋上陣……而饞嘴的Barth和潔儀，就急不及待地買雪糕吃！

黃昏我們來到一食街，Barth的新加坡朋友Nana和我們一起到一家唐樓上的小食店吃魚蛋和海南雞飯。

晚飯後我們 打道回府，途中竟見《樂華酒家》招牌 - 是會友所開的嗎？順道走過一個有很多小賣車的商場和參觀一所已轉作婚宴餐廳用途的教堂。

我們一同走上旋轉梯拍團體照，附近也有供燭光晚餐的露天茶座和聖誕樹及燈飾，很是浪漫呢！可惜我們不能久留，要早點休息預備明早的馬拉松比賽。

韓國MBC漢江馬拉松 Sub3.5夢想終實現

雖然小叻戰前三星期受傷停操了兩星期, 病了一星期, 總練習里數如下:
This week: 30k+
Last week: 70k+
2 weeks ago: sick 40k+
3 weeks ago: hurt 30k+
4 weeks ago: hurt 20k-
5 weeks ago: hurt 60k+
6 weeks ago: 70k+

但... 竟然PB呀!

15 144 장패령 小叻 (HKG) PB3:31 3:25:58 9:22:54 12:48:52 11:07:14

Expo的counter好靚呀~

賽道要上7-8次鈄, 有8-10k是上鈄路, 在起跑前, 小叻才弄斷了錶帶... 唔吉利! (都話小叻黑仔咖啦, 明明帶多了隻500lap, 但放了在酒店沒有帶出來... 早唔斷遲唔斷, 要在起步點會場先至斷!)

還有小叻左腳足底筋膜炎3k開始發作, 右腳扭傷舊患11k開始痛, 雙膝20k開始卡卡地, 22k開始下雨風吹得身體有點發冷, 回來時左小腿脛骨側痛.... 但小叻從來沒想過要放棄!

又和黎可基在這裡見喇~ 相識一週年呀!

起跑前洗洗手!

我提自己: 小叻不止是一個跑手, 還是一個戰士. 小叻身經百戰, 小小挫折難不到我.
我提自己: 我只不過在北潭涌練跑, 空氣清新, 很開心!
我提自己: 如果再跑不出330, 小叻就永遠不能再跑馬拉松了, 要拿出決心!
小叻真的很喜歡跑步啊~ 要拿出熱誠!

小叻已經長大, 不再是亂衝亂跟人pacing的小女孩. 我一起步就被轉轉.詩琳和May放甩了, 不過小叻沒有因此而亂了pacing追人, 也因小叻用手cool(多謝Walance送給我, 救了我一命!) 蓋著錶, 我只聽手錶count down4'57的嘟嘟聲, 20km時才看第一次!

由於下雨和腳痛, 小叻想盡快回程, 於是越跑越快, 12k見到May和詩琳尾燈, 14k過了詩琳, 18-19k過了May, 21k u-turn前見到轉轉就在前面約1k.
支持著小叻的, 有1)洪永賢的鼓勵email 2)Keith的說話:"小叻已經有多次over330的成績, 不用再造多一次! 由於你之前受了傷, 所以就算你爆了或上岸都無人會怪你, 所以你可以放心地去盡達標."
3)跑廈門時小叻用的口訣和 4)在終點等小叻的人...
於是小叻越戰越勇, 寧爆莫留!

小叻在最後4k互片煉嬴多一個韓國女子; 廖sir在last150米鼓勵., 結果最後100米還發力提腿過了一名新加玻女跑手!
最後1k, 前面的一個跑手(不知道是新加玻還是韓國的)有人出來同佢打氣和陪跑了少許, 好羨慕呀~ d香港人死晒去邊呀?!
在過終點後竟然是友會RRAC領隊William替小叻拍下了重要的一刻, 仲同我握手! 落雨濕濕... 非常感動... 好好好多謝佢呀~
但係... 點解除了Melissa之外, 返o黍之後都無咩其他人恭喜和讚小叻o既?
廖sir都只是一句:"跑得好, 加油!"
嗚嗚... 好失望... 小叻的成績可是用血淚換來的啊!

香港隊攝在invited athletic room內(應該有7男5女未齊), 多謝CSRA領隊Fanny的安排!

比賽戰況報告
一起步, 轉轉和詩琳和一眾精英跑手已經片了出去, 後面的公開組跑手已經蓋上來 (原來韓國好多快人!_, 見到亞May在30米前, 不過照佢步速我應該追唔到, Melissa又不見了... 然後見到個新加坡女仔, 拍住了跑第2-3k, 點知佢愈走愈快, 我就唔跟啦, 於是我就放鬆跑自己囉!

4k左腳底痛, 平時練習都無咁快咖, 頂住呀~
5-6k上鈄時, 有個紅色背心韓國四眼仔同我講o野, 浪費了我力氣...
10k成49分半, 我跑得好保守啦, 完全都無發過力!頭10k, 我都無睇過錶, 因為只聽4'57響一次的嘟嘟聲, 只要在k牌後響就可以了, 好像賺了很多!

起跑線前列隊

不過11k上大鈄時開始右腳痛就住落腳, 又飲水又食gel, 嘟嘟聲竟然在k牌附近響! 好在12k下鈄, 又可能啪了gel, 小叻回魂了, 竟然好有力, 好開心咁當自己在跑北潭涌或大尾督練跑, 咁就過番紅色背心韓國四眼仔.

於是12k半就見到詩琳尾燈, 13k見到May從廁所出來過番詩琳. 於是小叻追追下, 就14k過了詩琳, 但係佢應該吊住我尾…

16-17k一上鈄, 小叻又無力了, 被紅色背心韓國四眼仔過番我呀~ 但係聽到後面330波波集團在後面噓噓聲… 死啦, 點解d聲咁近? 唔通我慢o左好多? 當下打醒精神, 目標是唔比330波波過…

Pacers & 時間波波

18-19k見到香港男子回程, 即是又過一半啦, 小叻好有鬥志, 雖然有點累都發力過了亞May!
可能上落太多, 20k時雙膝有點卡, o拿, 乖啦, 唔好咁快死呀~小叻21k時間是1:41, 半程約1:42, 我那時知道頭半程已經成功, 要留守!
由於過了一半, 又開始下雨, 小叻決定發力急走, 不過25k再上鈄時有點辛苦…見到對面有3:45和4:00波波出現 – 死啦, 330唔係o係後面附近嘛?
25-26k, 小叻開始覺得有點凍, o黍料… 但有個橙色背心韓國靚仔同我互片, 上鈄時我慢了, 佢又揮手叫我追番佢, 諗住好啦, 有個靚仔陪下跑, 即刻提起精神拍住佢!點知到27k半下鈄, 小叻一發力, 佢就追我唔到… 仲諗住佢可以陪我10k8k, 到終點我一定問佢叫咩名tim~ 唉~ 無法啦, 繼續孤身上路…28-29k, 見到前面有個肌肉型大塊頭穿單車褲女子, 小叻過了她, 不過她有個男伴做pacer, 我一過了, 個男人就介我, 然後個女仔就追番上來, 小叻上鈄唔夠佢有力呀~30k, 時間是3:25, 我知道自己賺突了, 有5分鐘可以走盞, 只要尾10k keep住5分左右, 就可以3:2x完成! 好興奮, 也提自己要頂住盡做最好的PB!32k, 餘下10k, 雖然雙腳已經拖住咁跑, 估我點都死到55分內掛… 但33k時, 小叻迫自己keep住提腿大步d跑, 隻腳又有d痛, 辛苦到有d想喊…34k, 點解又上橋呀? 小叻要比力呀~ 唔好臨尾香!36k之後, 又係上橋? 唔好玩啦, 我提唔起腳喇~ 個37k牌死o左去邊呀… 成6-7分喇, 38k牌, 你快d出來啦, 唔好嚇我!過了39k, 小叻諗住求其捱番去… 點知有個途人打氣, 佢嗌hon-kong, 於是我回頭一看, 原來唔係同我打氣, 係叫我身後的韓國妹過我, 等我仲side力回頭望佢!

然後, 韓國妹過沙石鈄路時過了我, 我都無咩心追佢. 但見到個環湖路, 我知道是全平路又就快到, 咪當自己衝interval囉~ 於是500-600米之後過回她, 繼續發力提腿, 以免她跟上來! 小叻知道自己勤力練interval, 這幾k一定唔會輸!
然後, 小叻過了好多好多男人, 亦見到有一女子在約1k前...
最後1k, 小叻見到前面的跑手有人同佢打氣和陪跑, 我諗住香港隊有咁多人, 應該都有人出來打下氣掛? (點知係無!) 唔好衰比人睇, 於是又提起精神!

最後400米, 見到早早放甩我的新加坡女仔竟然在前面, 小叻當然不會放過她啦, 最後100米提晒腿, 好多觀眾都拍手掌呀!
Mission completed! 　小叻好好好開心呀！

22/10 MBC Marathon (Hangang, Korea) 3:25 PBPBPBPBPBPBPBPBPB!

當然最後要多謝Fanny和廖sir比個機會小叻去PB啦 - 雖然有人唔睇好我~ :p